make money

الثلاثاء، 5 يناير، 2010

داليا"أنا بحبك أنت"، لقبوها بملكة الرومانسية واعتمدت هذا اللقب من خلال أغنية "أنا بحبك أنت"




داليا(بحبك أنت): رجعت بعد ما حال الغنا اتعدل

نشر بتاريخ : 5 يناير 2010

غابت عن الساحة بعد أن تركت بصمتها الفنية بألبومين الأول "مغرمه" والثاني "أنا بحبك أنت"، لقبوها بملكة الرومانسية واعتمدت هذا اللقب من خلال أغنية "أنا بحبك أنت" وأصبحت الأغنية المتحدث الرسمي لأعياد الحب و لعشاق الرومانسية ..تعود داليا الأن من جديد ...عن سر ابتعادها ورجوعها المفاجىء تكشف المطربة داليا أسرار لأول مرة لحريتنا

حوار: أحمد عبد المجيد


ما سر ابتعادك عن الساحة بالرغم من نجاحك؟

مفيش اى سر في ابتعادى عن الساحة الفنية، الموضوع بكل بساطه أنا كنت في شركه إنتاج بتعمل فن جيد ولظروف عائلية المنتج قفل الشركه وكان عقدى معه لمده خمس سنين، فمقدرتش اتعامل مع شركه تانيه بسبب الإنتاج في تلك الفتره كان سيىء للغايه، وتهافتت علي العروض وقتها لكن فضلت التوقف لحين تغير الأحوال الفنية.

هناك أقوال ترددت أن اسباب غيابك وابتعادك عن الغناء هو زواجك..تعليقك؟

أنا مبطلتش غنا وكنت متواجده بعمل حفلات وألبومات وزواجي معطلنيش عن العمل بالعكس زوجى راجل فنان وعمره ما عاقنى في عملي الفني.

لماذا قرار الدويتو مع الفنان هشام نور؟

أولا احب أقول أن هشام صديق من زمان، وهو من الأصوات الجميلة اللى اتظلمت بجد ولما عرض علي الدويتو لم اتردد لحظه للوقوف أمام فنان أنا بحب صوته، ووافقت على الغناء والحمد لله الدويتو نجح بشهاده ناس كتير.

هل رجوع داليا للغناء بسبب الحنين للماضي وقبل ما يفوت الآوان؟

أنا مفكرتش فيها كده، أنا فكرت ارجع ازاى بشكل كويس بصرف النظرعن الوقت أن كان طويل او قصير، وأنا لم اسعى إلى النزول في وسط الهوجه بسبب لا شكلى ولا مبادئى حتسمح بده، وأظن أن الوقت الآن ملائم والناس ابتدت تزهق من الهابط وبتدورعلى الغنا السليم، وأنا راجعالهم بالشكل ده.

حدثينا عن مشروع ألبومك القادم ؟

بعد ما هشام نور دب فيه الحماس من جديد بعد نجاح الدويتو اللى قدمناه سوى في ألبومه الأخير "قلبك شجاع"، ابتديت افتح قنوات اتصالات مع شعراء وملحنيين على رأسهم الشاعر رضا زايد والملحن محمود الشابورى ومجموعه أخرى من الشاب الجديد، وبعمل جلسات مكثفة للحاق بالسيزون الجديد بالرغم من الاختيارات صعبه جدا لأنك أمام اختبار صعب أكون أو لا أكون، وأتمنى طرح ألبومي في الصيف القادم.

هل هناك شركة إنتاج تعاقدت معك للألبوم القادم؟

هناك عروض كثيرة من بعض الشركات ولكن حتى وقتنا هذا لم نصل إلى اتفاق نهائي، ولكن معظم أغاني الألبوم إنتاج ذاتي عن طريقي أنا وزوجي.

هل هناك من يتعاون معك في اختيار أغاني ألبومك؟

أنا بسمع الأول وبعدها بختار ومعى ايضا زوجى وصديقى هشام نور لأنى بثق في اختياراتهم، وهناك ايضا أصدقاء مقربين لى باخذ رأيهم، وفي الآخر الرأى الأول والأخير لى لأنى أنا اللى هغنى ولازم احس الموضوع قبل اى حد.

هل هناك نيه من تكرار نفس اللون الذي قدمتيه؟

ما اعتقدش هقدم نفس اللون واكرره تانى، بس أنا لى لون معين في أذهان جمهوري بتحبنى فيه ولكن هقدمه بشكل جديد ومتطور يواكب عصرنا دلوقتى، بمعنى مش معقوله أغنى سنه 2010 زي سنه 1999 هناك فرق كبير في التاريخ، بس نفس الخط بتاعى فن راقى ورومانسية بشكل شيك.

هل تشعرين بالخوف من خوضك للتجربة ومواجهه جمهورك بعد سنوات طويلة من الغياب؟

اكيد خايفه بس مش الخوف الكبير، ولكن خوف من المسئولية على نجاح التجربة، ولو نظرت إلى كمية التعليقات اللى وصلت لى بعد تقديمى الدويتو مع هشام نور هتعرف أن جمهوري مستنينى وبيشجعنى للرجوع بأسرع وقت، وأكيد أنا راجعلهم بحاجه أتمنى تعجبهم عشان انتظارهم ميرحش هدر وأنا لو حسيت انى مش هقدم اى جديد أو مش هاقدر ارجع لجمهورى مش راجعه.

هل معنى ذلك أن هناك خطط بعد البومك القادم لطرح ألبوم كل عام؟

الخطط دى متوقفه على نجاح ألبومى القادم وهو اللى هيحدد حاجات كتير في مستقبلى القادم والاستمراريه في الساحة أو الرجوع.

ما رأيك في الساحة الفنية الآن؟

أنا شايفاها أحسن بكتير من زمان، وابتدت ترتقى بالغنا من تانى عكس الفترة اللى فاتت كانت كلها هلس وفضايح، وكل من هب ودب بيعمل ألبوم وأصوات لا تصلح للاستهلاك السمعى ولكن الان فيه إنتاج وألبومات جيده وعلى العموم في مبدأ في الفن البقاء للأحسن.

مين من الأصوات اللى داليا بتحب تسمعهم؟

من المطربات شرين وأنغام واليسا وأصاله ونانسى عجرم أصوت هايله ومن المطربيين هشام نور وعمرو دياب ومحمد حماقى وتامر حسنى.

كلمة توجيهيها لجمهورك؟

مش عارفه اعبر له، وبشكره على وقوفى جنبى، وبشكر كل اللى معايا على الفيس بوك، وبتمنى اقدم لهم حاجه كويسة يفتكرونى بيها تانى وكل سنه وجمهورى بخير..

المصدر : خاص حريتنا

0 التعليقات: